មន្ត្រីជាន់ខ្ពស់ស្ថានទូតសហរដ្ឋអាមេរិកបានប្រាប់សារព័ត៌មានថ្មីៗថា ស្ថានទូតមិនបានឃើញលិខិតរបស់លោកនាយករដ្ឋមន្ត្រី ហ៊ុន សែន ដែលស្នើសុំខ្ចីផែនទីកម្ពុជាវៀតណាម ពីរដ្ឋាភិបាលសហរដ្ឋអាមេរិកនោះឡើយ។
អ្នកនាំពាក្យស្ថានទូតអាមេរិកប្រចាំកម្ពុជាលោក Courtney Woods បានឆ្លើយប្រាប់សារព័ត៌មានថ្មីៗតាមរយៈអ៊ីមែលនៅរសៀលថ្ងៃទី១៦កក្កដានេះយ៉ាងដូច្នេះថា៖«យើងមិនបានទទួលលិខិតរបស់លោកនាយករដ្ឋមន្ត្រី ឬការអត្ថាធិប្បាយពីវ៉ាស៊ីនតោនទាក់ទងនឹងខ្លឹមសារនៃលិខិតនោះឡើយ»។
ផ្ទុយពីស្ថានទូតអាមេរិក មន្ត្រីស្ថានទូតបារាំង និងស្ថានទូតអង់គ្លេសប្រចាំកម្ពុជាសុទ្ធតែអះអាងថា ពួកគេបានទទួលលិខិតរបស់លោកនាយករដ្ឋមន្ត្រីកម្ពុជា ហើយពួកគេកំពុងរៀបចំផ្ញើលិខិតនេះបន្តទៅរដ្ឋាភិបាលរបស់ពួកគេដែរ។
ផ្ទុយពីស្ថានទូតអាមេរិក មន្ត្រីស្ថានទូតបារាំង និងស្ថានទូតអង់គ្លេសប្រចាំកម្ពុជាសុទ្ធតែអះអាងថា ពួកគេបានទទួលលិខិតរបស់លោកនាយករដ្ឋមន្ត្រីកម្ពុជា ហើយពួកគេកំពុងរៀបចំផ្ញើលិខិតនេះបន្តទៅរដ្ឋាភិបាលរបស់ពួកគេដែរ។
ពីស្ថានទូតបារាំង លោក Nicolas BAUDOUIN ដែលជាលេខាទី១ និងជាអ្នកនាំពាក្យស្ថានទូតផងនោះ លោកបានបញ្ជាក់ថាស្ថានទូតបានទទួលលិខិតរបស់លោកនាយករដ្ឋមន្ត្រីកម្ពុជាហើយ។
តាមរយៈសារអេឡិចត្រូនិក លោកលេខាទី១នៃស្ថានទូតបារាំងប្រចាំកម្ពុជាបានសរសរយ៉ាងដុច្នេះថា៖«យើងពិតជាបានទទួលលិខិតរបស់លោកនាយករដ្ឋមន្ត្រីហ៊ុន សែន ហើយយើងនឹងផ្ញើលិខិតនេះបន្តទៅទីក្រុងប៉ារីសក្នុងសប្តាហ៍នេះ»។
ដូចគ្នាដែរ ស្ថានទូតអង់គ្លេសក៏បានអះអាងថា ខ្លួនបានឃើញលិខិតរបស់លោក ហ៊ុន សែន ដែរ។ «យើងអាចបញ្ជាក់បានថា យើងទទួលបានការស្នើសុំ [របស់លោកនាយករដ្ឋមន្ត្រីហ៊ុន សែន] ហើយយើងកំពុងរៀបចំផ្ញើលិខិតនេះទៅការិយាល័យនាយករដ្ឋមន្ត្រីរបស់យើង»។ នេះជាការឆ្លើយតបរបស់ស្ថានទូតអង់គ្លេសមកសារព័ត៌មានថ្មីៗតាមអ៊ីមែលនៅរសៀលថ្ងៃព្រហស្បតិ៍នេះ។
ទោះយ៉ាងណាក៏ដោយ មន្ត្រីជាន់ខ្ពស់នៃស្ថានទូតបារាំង និងអង់គ្លេសបញ្ជាក់ថា ពួកគេមិនអាចអត្ថាធិប្បាយអ្វីលើសពីនេះនោះទេ។
បន្ទាប់ពីមិនបានទទួលចម្លើយជាវិជ្ជមានពីអង្គការសហប្រជាជាតិ ទាក់ទងនឹងការស្នើសុំខ្ចីផែនទីកម្ពុជាដែលត្រូវបានទទួលស្គាល់ជាអន្តរជាតិនោះ ប្រមុខរដ្ឋាភិបាលកម្ពុជា លោក ហ៊ុន សែន បានសរសេរលិខិតចំនួន៣ទៅប្រធានាធិបតីសហរដ្ឋអាមេរិក លោក បារ៉ាក់ អូបាម៉ា ទៅលោកប្រធានាធិបតីបារាំង លោក ហ្វ្រង់ស័រ ហូឡង់ និងលោកនាយករដ្ឋមន្ត្រីអង់គ្លេស ដេវីត ខេមេរ៉ុន ដើម្បីស្នើសុំខ្ចីផែនទីអន្តរជាតិរបស់កម្ពុជា ដែលកម្ពុជាជឿជាក់ថាពួកគេនៅមាន ដើម្បីយកផែនទីទាំងនោះមកផ្ទៀងផ្ទាត់ ជាមួយផែនទីដែលរដ្ឋាភិបាលកម្ពុជាបានប្រើប្រាស់សព្វថ្ងៃ។ គោលដៅគឺដើម្បីដោះស្រាយទំនាស់បន្ទាត់ព្រំដែនជាមួយវៀតណាម៕
-----------------------------------------
Source:http://www.thmeythmey.com/?page=detail&ctype=article&id=28732&lg=kh
