បែកធ្លាយរឿងអាស្រូវពុករលួយនៅក្នុងនាយកដ្ឋានអប់រំកាយនិងកីឡានៃក្រសួងអប់រំ
អំពើពុករលួយនៅក្នុងនាយកដ្ឋានអប់រំកាយនិងកីឡានៃក្រសួងអប់រំយុវជន និងកីឡាដែលមានលោក ហង់ ជួនណារ៉ុន ជារដ្ឋមន្ត្រី កំពុងតែធ្វើឲ្យរាំងស្ទះដល់គោលដៅកែទម្រង់វិស័យអប់រំឲ្យបានប្រសើរជាងមុន។ ជាក់ស្តែង មន្ត្រីរាជការនៃនាយកដ្ឋានអប់រំកាយ និងកីឡាបានចោទប្រកាន់លោក ហ៊ុន សាមុត ប្រធាននាយកដ្ឋាននេះ ថាចាយវាយប្រាក់ ភីប៊ី (PB) ប្រចាំឆ្នាំ គ្មានតម្លាភាព។ បញ្ហានេះលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជននិងកីឡា ត្រូវចាត់វិធានការដោះស្រាយជាបន្ទាន់ដើម្បីចៀសវាងកុំឲ្យមានអំពើពុករលួយកើតឡើងនៅក្នុងក្រសួងអប់រំតទៅទៀត។
មន្ត្រីរាជការនៃនាយកដ្ឋានអប់រំកាយនិងកីឡា ជាច្រើនរូបបានឲ្យដឹងថា ពួកគាត់មិនសប្បាយចិត្តចំពោះទង្វើរបស់លោក ហ៊ុន សាមុត ដែលជាប្រធាននាយកដ្ឋាន ព្រោះលោក ហ៊ុន សាមុត ប្រព្រឹត្តអំពើពុករលួយបក្ខពួកនិយម ចាត់ចែងថវិកាគម្រោងចាយវាយប្រចាំឆ្នាំ ដែលក្រសួងដាក់ឲ្យប្រើប្រាស់គ្មានតម្លាភាព ឬបង្ហាញឲ្យត្រឹមត្រូវដូចជាការបញ្ជូនមន្ត្រីទៅបំពេញបេសកកម្មជាដើម។ មន្ត្រីរាជការនាយកដ្ឋាន អប់រំកាយនិងកីឡាបានរៀបរាប់ទៀតថា លុយក្នុងមួយឆ្នាំៗ ហើយនៅឆ្នាំ២០១៥ លុយធ្លាក់ពីក្រសួងមកចំនួន ១២៨៨លានរៀល ឥឡូវដល់ខែមិថុនាហើយ អត់មានបុគ្គលិកចុះ PB ឬលិខិតឧទ្ទេសនាម ប្រធាននាយកដ្ឋាននិងបក្ខពួកធ្វើលិខិតលួចលាក់បិទបាំងតែគ្នាគេ ហើយមិនដឹងអ្នកណាចាយលុយហ្នឹង។ ដូច្នេះ លោក ហង់ ជួនណារ៉ុន ដែលជារដ្ឋមន្ត្រីគួរពិនិត្យនិងចាត់វិធានការឲ្យបានច្បាស់លាស់ បើទោះបីលោក ហ៊ុន សាមុត បដិសេធថា លោកមិនបានប្រព្រឹត្តអំពើពុករលួយក៏ដោយ។
សូមបញ្ជាក់ថា វិស័យអប់រំ ក្នុងប្រទេសកម្ពុជាបច្ចុប្បន្ននៅតែមានភាពទន់ខ្សោយ មិនឃើញមានការរីកចម្រើនគួរឲ្យកត់សម្គាល់ទេ ហើយសូម្បីតែនៅតាមអនុវិទ្យាល័យ និងវិទ្យាល័យមួយចំនួនក៏ថ្នាក់ដឹកនាំ ប្រព្រឹត្តអំពើពុករលួយដែរ។ ប្រការនេះហើយ ដែលធ្វើឲ្យការប្តេជ្ញាចិត្តរបស់លោក ហង់ ជួនណារ៉ុន រដ្ឋមន្ត្រីក្រសួងអប់រំមិនអាចទទួលជោគជ័យ ព្រោះសូម្បីតែនាយកដ្ឋានសំខាន់ៗក្នុងក្រសួងអប់រំយុវជននិងកីឡា ក៏កើតមានអំពើពុករលួយយ៉ាងពេញបន្ទុក។ ដូច្នេះករណីលោក ហ៊ុន សាមុត ប្រធាននាយកដ្ឋានអប់រំកាយនិងកីឡានៃក្រសួងអប់រំ ប្រព្រឹត្តអំពើពុករលួយ គឺជារឿងដែលរដ្ឋមន្ត្រីក្រសួងអប់រំ ត្រូវចាត់វិធានការស៊ើបអង្កេតជាបន្ទាន់បំផុត៕
