ផ្លូវរូងក្រោមដី ដែលហ្គូស្មាន់ ប្រើប្រាស់ដើម្បីរត់គេចខ្លួនពីគុក។ AFP
ស្តេចគ្រឿងញៀនម៉ិកស៊ិក ហ្គូស្មាន់ ចំណាយ $៥០លាន ជីករូងក្រោមដី ១,៥ គីឡូម៉ែត្រដើម្បីរត់គេចខ្លួន
ក្រុងម៉ិស៊ីកូៈ វាមិនមែនជារឿងអច្ឆរិយអ្វីទេ ដែលផ្លូវរូងក្រោមដីចម្ងាយ ១,៥ គ.ម. ជាមធ្យោបាយជម្រើសចុងក្រោយ បំផុតរបស់ស្តេចគ្រឿងញៀនម៉ិកស៊ិក លោក ចូគ្វីន ហ្គូស្មាន់ដែលមានរហស្ស នាមថា អែលចាប៉ូ ដើម្បីរត់គេចខ្លួន ពីពន្ធនាគារដែលមានសន្តិសុខអតិបរមាមួយនោះ ដែល បើតាមកាសែត Daily Mail របស់អង់គ្លេស បានឲ្យដឹងថា ផ្លូវរូងក្រោមដីនេះអាចត្រូវចំណាយប្រាក់រហូតដល់ ៥០ លានដុល្លារ ដើម្បីជួលក្រុមវិស្វករជីកសម្រាប់ការរត់គេចខ្លួននេះ។
ពេញមួយរជ្ជកាលរបស់លោក ជាប្រមុខក្រុមគ្រឿងញៀនដ៏ព្រៃផ្សៃបំផុតរបស់ម៉ិកស៊ិក ផ្លូវរូងក្រោមដីក្លាយជាជម្រកសំខាន់មួយដែលសេ្ដចគ្រឿងញៀនល្បីឈ្មោះបំផុតរបស់ម៉ិកស៊ិករូបនេះ រស់នៅ លាក់ខ្លួនពីក្រុមអាជ្ញាធរដែលតាមចាប់ខ្លួន លោក និងបានសាងអាណាចក្រមួយ ដែលបានធ្វើឲ្យទស្សនាវដ្តី Forbes ចុះបញ្ជីថា ជាជនមានអំណាចម្នាក់ មានទ្រព្យច្រើនបំផុតរបស់ពិភពលោក។
នេះ គឺជាការជីកផ្លូវរូងក្រោមដីដ៏ល្បីបំផុតរបស់ក្រុមគ្រឿងញៀននៃរដ្ឋ Sinaloa សម័យបច្ចុប្បន្ន។ ការរត់គេចខ្លួនពីគុកបន្ទាប់ពីលោកហ្គូស្មាន់រត់ចេញពីគុក Altiplano របស់ម៉ិកស៊ិកពីចុងសប្តាហ៍មុន ក្រុមអាជ្ញាធរនិយាយថាពួកគេបានរកឃើញផ្លូវក្រោមដីដ៏គួរឲ្យភ្ញាក់ផ្អើលមួយ ជាផ្លូវដែលមានភ្លើងបំភ្លឺ និងមានខ្យល់អុកស៊ីសែនចេញចូល បំពាក់ដោយ ផ្លូវដែក និងម៉ូតូកែច្នៃមួយនៅខាងក្នុង។
ស្នងការសន្តិសុខជាតិម៉ិកស៊ិក លោក Monte Alejandro Rubido បាននិយាយថា ផ្លូវរូងក្រោមដីនេះបានចាប់ផ្ដើម ចេញពីប្រឡោះទំហំកន្លះម៉ែត្រ៤ជ្រុង នៅ ខាងក្នុងកន្លែងងូតទឹកនៃបន្ទប់គុករបស់ លោកហ្គូស្មាន់ ដែលបានតភ្ជាប់ទៅផ្លូវលុងចុះក្រោមជម្រៅប្រមាណ១០ម.។
ផែនទីបង្ហាញពីផ្លូវរូងក្រោមដី ដែលហ្គូស្មាន់ ប្រើប្រាស់ដើម្បីរត់គេចខ្លួនពីគុកជាលើកទីពីរពីថ្ងៃសៅរ៍ និងរន្ធកន្លះ។ AFP
ច្រកចុះដែលបំពាក់ដោយជណ្ដើរមួយនោះ បាននាំទៅកាន់ផ្លូវរូងក្រោមដីមួយ ដែលមានកម្ពស់ប្រមាណ១,៧ម៉ែត្រ និងទទឹងជាង ៧០ សង់ទីម៉ែត្រ។ នៅខាងក្នុងផ្លូវរូងនោះ ក្រុមអ្នកស៊ើបអង្កេតបានរកឃើញអ្វីដែលលោក Rubido ពណ៌នាថាជាម៉ូតូធំដែលគេកែច្នៃមួយគ្រឿងបំពាក់នៅលើផ្លូវដែក ដែលទំនងជាត្រូវគេប្រើ ដើម្បីដឹកជញ្ជូនដីចេញក្នុងអំឡុងពេលនៃការជីករូងដី និងដឹកជញ្ជូនឧបករណ៍សម្រាប់ការជីក»។
មន្ត្រីម៉ិកស៊ិកម្នាក់ ប៉ាន់ស្មានថា គេប្រើមនុស្សមិនលើសពី៤នាក់ និងពេលវេលាប្រមាណមួយឆ្នាំ ដើម្បីជីក និងសង់ផ្លូវរូងក្រោមដីនោះ ខណៈដីនិងខ្សាច់ប្រមាណ ជា៣២៥០តោន ស្មើនឹង ៣៥០ រថយន្តធំពេញៗ ត្រូវបានយកចេញ។
យោងតាមកសិករម្នាក់ ដែលរស់នៅ ក្បែរនោះឲ្យដឹងថា ផ្លូវក្រោមដីមានប្រវែង ជាង១,៥គីឡូម៉ែត្រ និងបានបញ្ចប់នៅខាងក្នុងផ្ទះដែលទើបតែសង់បានពាក់ កណ្ដាលមួយ។
ក្រុមអ្នកសាងសង់បាន ចាប់ផ្ដើមសង់ផ្ទះនោះនៅក្នុងខែធ្នូ បន្ទាប់ មកបានឈប់សាងសង់ប៉ុន្មានខែក្រោយមក។
កសិកររូបនោះបាននិយាយថា ផ្នែក ខាងមុខទំនងជាបានធ្វើរួចហើយអំឡុងខែកុម្ភៈ ឬខែមីនា ប៉ុន្តែក្រុមកម្មករនៅតែ បន្តជញ្ជូនដីដាក់ជុំវិញអគារនោះជាច្រើន ខែរហូតមកទល់ថ្ងៃសុក្រ ដែលពួកគេទាំង អស់ស្រាប់តែបាត់អស់។
តើអ្នកណាបានជួយ លោកហ្គូស្មាន់ជីករូងក្រោមដីនោះ ហើយតើបុគ្គលិកគុក មានជាប់ពាក់ព័ន្ធដែរឬទេ?
ប្រធានាធិបតីម៉ិកស៊ិក លោកអេនរី ប៉េណា នីតូ បាននិយាយថា នោះ គឺជាអ្វី ដែលក្រុមអាជ្ញាធរកំពុងស៊ើបអង្កេត។ក្រុមអ្នកវិភាគនិយាយថា មានមន្ទិលតិចតួចដែលថា ក្រុមមន្ត្រីនៅខាងក្នុងគុក គឺជាផ្នែកនៃផែនការនោះ។
អ្នកកាសែត លោក Ioan Gril ជាអ្នកនិពន្ធសៀវភៅ«ការបះបោរឧក្រិដ្ឋកម្មនៅ ក្នុងប្រទេសម៉ិកស៊ិក» បាននិយាយថា៖ «អ្នកមិនអាចសង់ផ្លូវរូងមួយចូលដល់ក្នុងគុកដោយគ្មានអំពើពុករលួយទេ»។
រដ្ឋាភិបាលម៉ិកស៊ិកកាលពីថ្ងៃអង្គារ បានប្រកាសផ្តល់ប្រាក់រង្វាន់ ៣,៨ លានដុល្លារ អាមេរិក សម្រាប់ការចាប់ខ្លួនស្តេចគ្រឿងញៀនដែលកំពុងរត់គេចខ្លួន លោកចូគ្វីន ហ្គូស្មាន់ និងបានបណ្តេញមន្ត្រីគុកកំពូលបីនាក់ ចំពេលមានការសង្ស័យថា ក្រុមឆ្មាំបានជួយឲ្យគាត់រត់គេច។
រដ្ឋមន្ត្រីមហាផ្ទៃលោក Miguel Angel Osorio Chong បានថ្លែងពីថ្ងៃចន្ទថា លោកហ្គូស្មាន់ «ពិតជាមាន» ការជួយពីក្រុមមន្ត្រីគុកក្នុងការរត់គេចដ៏ព្រហើនរបស់លោកពីថ្ងៃសៅរ៍នោះ។
លោក Osorio Chong បានថ្លែងថា លោកបានសម្រេចចិត្ត បណ្តេញប្រធានគុក Altiplano ក៏ដូចជាប្រមុខប្រព័ន្ធពន្ធនាគារជាតិនិងអគ្គសម្របសម្រួលដើម្បី សម្រួលដល់ការស៊ើបអង្កេត។
ក្រុមរដ្ឋអាជ្ញាម៉ិកស៊ិក ដែលកំពុងស៊ើបអង្កេតការរត់គេចខ្លួនរបស់ស្ដេចគ្រឿងញៀន ហ្គូស្មាន់ ក៏បានឃុំខ្លួនមន្ត្រីគុក ២២ នាក់ពីថ្ងៃពុធ ជុំវិញការសង្ស័យថា អ្នកទោសរត់គេចខ្លួនជើងឆើតនោះមានការជួយពីខាងក្នុង។
ខណៈការតាមប្រមាញ់លោកហ្គូស្មាន់ ចូលថ្ងៃទីបីនោះ ការិយាល័យអគ្គមេធាវី បានដោះលែងបុគ្គលិកគុក ១២ នាក់ ក្នុងចំណោម ៣៤ នាក់ ដែលត្រូវសួរចម្លើយចាប់តាំងពីថ្ងៃអាទិត្យមក។
ក្រុមមន្ត្រីបាននិយាយកាលពីថ្ងៃពុធ ថា ក្រុមអាជ្ញាធរម៉ិកស៊ិក កំពុងឆែកឆេរសណ្ឋាគារ មន្ទីរពេទ្យ និងផ្ទះ ធ្វើបុណ្យសពទាំងឡាយនៅក្នុងការតាមប្រមាញ់ ហ្គូស្មាន់ ខណៈកំពុងលើកស្ទួយប្រតិបត្តិការនៅឯព្រំដែនក្វាតេម៉ាឡា។
ក្រសួងមហាផ្ទៃ បាននិយាយថា ប៉ុស្តិ៍ ឆែកឆេរ ១០១ កន្លែងត្រូវបានដាក់នៅ លើផ្លូវសំខាន់ៗនិងផ្លូវហាយវ៉េ ២១ នៃ ៣១ រដ្ឋនិងក្រុងរបស់ប្រទេស។ ខិត្តប័ណ្ណជាង ១០ ម៉ឺនសន្លឹកដែលមានរូបថតហ្គូស្មាន់ ត្រូវបានចែកចាយ។
ប៉ូលិសប្រមាណ ១២៥០ នាក់ ត្រូវបានបែងចែក ជាក្រុមរុករកពិសេស ជុំវិញ គុក Altiplano ខណៈកម្លាំងពិសេសជាង១៨០នាក់មកពីអាវុធហត្ថ កំពុងរុករកស្តេចគ្រឿងញៀន រដ្ឋ Sinaloa នេះ៕
