លោក អ៊ុំ សំអាន តំណាងរាស្ត្រគណបក្សប្រឆាំង។ ហេង ជីវ័ន
ភ្នំពេញៈ ក្រុមអ្នកជំនាញច្បាប់រដ្ឋសភាបានធ្វើការទាំងថ្ងៃឈប់សម្រាកចាប់តាំងពីថ្ងៃសុក្ររហូតដល់ថ្ងៃម្សិលមិញដើម្បីសិក្សាតាមផ្លូវច្បាប់ដែលអាចនឹងឈានទៅដល់ការព្យួរអភ័យឯកសិទ្ធិសភាតំណាងរាស្ត្រគណបក្សប្រឆាំងលោក អ៊ុំ សំអាន ដោយសារតែតំណាងរាស្ត្ររូបនេះបានចោទប្រកាន់ប្រធានរដ្ឋសភាលោក ហេង សំរិន ថាបំពានលើរដ្ឋធម្មនុញ្ញករណីមិនព្រមបញ្ជូនលិខិតបន្តទៅរដ្ឋាភិបាល។ នេះបើតាមលោក ឈាង វុន អ្នកនាំពាក្យរដ្ឋសភា និងជាតំណាងរាស្ត្រគណបក្សប្រជាជន។
លោក ឈាង វុន បានប្រាប់ភ្នំពេញប៉ុស្តិ៍ពីម្សិលមិញថាក្រុមអ្នកជំនាញច្បាប់របស់សភាបានជួបប្រជុំគ្នាទាំងក្នុងថ្ងៃឈប់សម្រាកដើម្បីសិក្សា និងពិចារណាលើករណីតំណាងរាស្រ្តគណបក្សសង្គ្រោះជាតិលោក អ៊ុំ សំអាន ដែលបានចោទប្រកាន់ លោក ហេង សំរិន ថាមិនគោរពរដ្ឋធម្មនុញ្ញហើយតំណាងរាស្ត្ររូបនេះគ្រោងដាក់ពាក្យបណ្តឹងទៅក្រុមប្រឹក្សាធម្មនុញ្ញប្រឆាំងនឹងលោក ហេង សំរិន ករណីដែលលោក ហេង សំរិន មិនព្រមផ្ញើលិខិតរួមរបស់ក្រុមតំណាងរាស្រ្តគណបក្សប្រឆាំងទៅរដ្ឋាភិបាលពាក់ព័ន្ធនឹងសំណើសុំឲ្យផ្អាកការបោះបង្គោលព្រំដែនជាមួយវៀតណាម។
ជាមួយគ្នានេះ លោក ឈាង វុន បានបង្ហើបដោយជំរុញឲ្យលោក សំអាន ប្រញាប់ជួបជាមួយ លោក សំរិន និងសម្រុះសម្រួលគ្នាបញ្ចប់បញ្ហានេះក្រែងលោអភ័យឯកសិទ្ធិសភារបស់គាត់ អាចត្រូវព្យួរដោយគណៈកម្មាធិការអចិន្រៃ្តយ៍នៃរដ្ឋសភា ឬប្រហែលលោក សំអាន អាចត្រូវប្រឈមមុខនឹងចំណាត់ការផ្លូវច្បាប់ណាមួយនៅពេលអ្នកជំនាញច្បាប់រកឃើញកំហុសពីព្រោះអ្នកជំនាញច្បាប់បានផ្ញើរបាយការណ៍ទៅលោក សំរិន រួចហើយ។
លោក វុន ថ្លែងថា៖ «គណៈកម្មាធិការអចិន្រ្តៃយ៍នៃរដ្ឋសភាមិនដែលសម្រេចពីរភាគបីនោះទេ។ នៅក្នុងគណៈកម្មាធិការអចិន្រ្តៃយ៍សម្រេច ៥០+១»។ «ប៉ុន្តែខ្ញុំនិយាយម្តងហើយម្តងទៀតខ្ញុំមិនចង់ឲ្យស្ថានភាពនេះធ្លាក់ទៅដល់ដំណាក់កាលនោះទេ»។ លោក វុន បន្ថែមថា លោក សំអាន បានប្រព្រឹត្តខុសក្នុងចំណុចណាមួយក្នុងមាត្រាណាមួយ ឬក្នុងករណីព្រហ្មទណ្ឌណាមួយដែលប៉ះពាល់ដល់លោក ហេង សំរិន កំហុសរបស់គាត់ត្រូវបានរកឃើញរួចហើយ។
លោក ឈាង វុន បានព្រមានថា៖ «ដូច្នេះទូកបានរៀបចំចាកចេញរួចហើយ ហើយប្រសិនបើទូកចេញអត់ត្រឡប់មកវិញទេ»។
ប៉ុន្តែលោក សំអាន មិនខ្វល់អំពីករណីអ្នកជំនាញច្បាប់ណាសិក្សាអំពីករណីរបស់លោកជាមួយលោក សំរិន ដូចការអះអាងរបស់លោក ឈាង វុន ទេដោយលោកថ្លែងថាគណៈកម្មាធិការអចិន្រ្តៃយ៍មិនអាចព្យួរអភ័យឯកសិទ្ធិរបស់លោកបានទេដរាបណាមិនមានការសម្រេចដោយសំឡេង ២ ភាគ ៣ នៃតំណាងរាស្រ្តទាំងមូល។
លោក សំអាន ថ្លែងថា៖ «ខ្ញុំយល់ព្រមជួបជាមួយសម្តេច ហេង សំរិន ប៉ុន្តែខ្ញុំសូមឲ្យគាត់ផ្ញើលិខិតរបស់ខ្ញុំទៅសម្តេចនាយករដ្ឋមន្រ្តី ហ៊ុន សែន។ ប្រសិនបើគាត់មិនព្រមផ្ញើខ្ញុំនឹងពិភាក្សាជាមួយតំណាងរាស្រ្តថាតើយើងត្រូវការដាក់ពាក្យបណ្តឹងឬអត់»៕ PS
