Tue, 7 July 2015
ភ្នំពេញ: ព័ត៌មានពីតារាចម្រៀងបានសម្រស់ កញ្ញា អ៊ីវ៉ា វេចសម្ពាយចាកចេញពីផលិតកម្មសាន់ដេរត់ទៅជ្រកក្រោមដំបូលផលិតកម្មថោន កំពុងដុតកម្ដៅដុំចិត្តម្ចាស់ផលិតកម្មសាន់ដេដោយចេញសារប្រតិកម្មដាច់ខាតថា អ៊ីវ៉ា គ្មានថ្ងៃរត់ចោលទ្រនំនេះឡើយ។
តាំងពីឆ្នាំ ២០០៩ អ៊ីវ៉ា បានជ្រកផលិតកម្មសាន់ដេ និងមានបទចម្រៀងល្បីជាបន្តបន្ទាប់លក់លើទីផ្សាររហូតជាប់ងារម្ចាស់បទ «អាក្រក់ល្អបងជាសង្សារអូន» និង «ទឹកអប់មានពិស» ជាដើម។ ប៉ុន្តែតារាចម្រៀង អ៊ីវ៉ា ដែលមានឈ្មោះកំណើត ឃិន ស្រីនាថ បែរជាផ្ទុះដំណឹងរត់ទៅជ្រកនៅថោនដោយសម្ងំថតបទចម្រៀងថ្មីៗត្រៀមចេញលក់លើទីផ្សារក្នុងពេលឆាប់ៗ។
ជាមួយចំហាយព័ត៌មាននោះក៏មានការលើកឡើងថា អ៊ីវ៉ា សម្រេចវេចបង្វេចចេញពីសាន់ដេដែលធ្លាប់ជប់ឲ្យនាងល្បីលើអាជីពចម្រៀងនោះព្រោះតែនាងអាក់អន់ចិត្តមិនសូវមានបទនិពន្ធសម្រាប់នាងម្យ៉ាងនាងក៏អត់ឱកាសធ្វើតួឯកក្នុងភាពយន្តនៅទ្រនំនេះផងដែរ។
ជុំវិញដំណឹងលេចឮនេះ ភ្នំពេញ ប៉ុស្តិ៍ មិនអាចសុំការបកស្រាយពី អ៊ីវ៉ា បានទេកាលពីម្សិលមិញ។ ប៉ុន្តែដកស្រង់ពីវេបសាយក្នុងស្រុកកញ្ញាអះអាងថា៖ «ឥឡូវនាងខ្ញុំអត់ទាន់ដឹងថាតើគួរបន្តកុងត្រាទៀត ឬអត់?តែបើកុងត្រាថ្មីក្រុមហ៊ុនឲ្យធ្វើ ១ ឆ្នាំ ឬ ៣ ឆ្នាំនោះនឹងធ្វើការពិចារណា»។
ដោយឡែកគណនីហ្វេសប៊ុកផ្លូវការមានឡូហ្គោផលិតកម្មសាន់ដេបានសរសេរប្រតិកម្មចំពោះវេបសាយពីរដែលចុះផ្សាយថា តារាចម្រៀង អ៊ីវ៉ា ចេញពីសាន់ដេចូលផលិតកម្មថោនដោយមិនបានសួរនាំអ្នកគ្រប់គ្រង។
ម្ចាស់ផលិតកម្មសាន់ដេ លោក ឡាយ សុខចំរើន បានអះអាងថា៖ «កញ្ញា អ៊ីវ៉ា កំពុងថតបទចម្រៀងថ្មីជាច្រើនហើយនាងគ្មានថ្ងៃចេញពីសាន់ដេឡើយព្រោះនាងជាតារាចម្រៀងដ៏សំខាន់ក្នុងផលិតកម្មសាន់ដេដែលមិនអាចខ្វះបានឡើយ»។
ផ្ទុយទៅវិញប្រភពពីក្រុមការងារផលិតកម្មថោនបានបង្ហើបឲ្យដឹងថា កញ្ញា អ៊ីវ៉ា កំពុងសម្ងំថតបទចម្រៀងថ្មីៗជាច្រើនត្រៀមចេញលក់ក្នុងពេលឆាប់ៗនេះដែរព្រោះនាងបានស្គាល់អ្នកនិពន្ធម្នាក់នៅទ្រនំថោនហើយក៏ជាអ្នកនិពន្ធដែលសរសេរចម្រៀងឲ្យនាងច្រៀងពីដំបូងរហូតបានល្បីដល់សព្វថ្ងៃ។
មិនទាន់ដឹងថាតារាចម្រៀង អ៊ីវ៉ា និងលោក ឡាយ សុខចំរើន ដោះស្រាយគ្នាយ៉ាងណាទេព្រោះតារាល្បីដូរផលិតកម្មច្រៀងប្រឈមបញ្ហាចម្រូងចម្រាសច្រើនអាចដល់ការប្ដឹងប្ដល់។
ជួបជាមួយ ភ្នំពេញ ប៉ុស្តិ៍ តាមទូរស័ព្ទលោក ឡាយ សុខចំរើន អះអាងថា៖ «អ៊ីវ៉ា នាងគ្មានវេចបង្វេចទៅណាដូចគេល្បីនោះទេ។ គេចេះតែប្រឌិតដំណឹងបង្កការភ្ញាក់ផ្អើល»។ លោកបន្តថា៖ «រឿងកុងត្រាវាជារឿងសម្ងាត់ផលិតកម្ម និងសាមីខ្លួនមិនអាចលើកមកនិយាយបានទេតែពេលនេះ អ៊ីវ៉ា មិនបានទៅណាហើយក៏កំពុងថតបទចម្រៀងថ្មីៗទើបចេញលក់ដែរ»។
លោក ឡាយ សុខចំរើន បន្ថែមថា៖ «នាងគ្មានថ្ងៃទៅណាចោលផលិតកម្មទេ កុំចេះតែជឿគេនិយាយបង្ខូចហ្នឹង»៕
