Fri, 10 July 2015
ដាណឺម៉ាក ៖ បុរាណវិទូមានការភ្ញាក់ផ្អើលយ៉ាងខ្លាំងបន្ទាប់ពីជីករកឃើញមាសដែលគេច្រៀកជាសន្លឹកវ័ណ្ឌជាប់ៗគ្នាវែងៗ ដូចជាអាចម៍រណា មានចំនួនប្រមាណ ២០០០ ចម្រៀក នៅឯវាលមួយនៅភាគខាងកើតនៃប្រទេសដាណឺម៉ាក។
លោក Flemming Kaul សាស្ត្រាចារ្យសារមន្ទីរជាតិ ក្នុងក្រុង Copenhagen បានឲ្យដឹងថា បំណែកសន្លឹកវ័ណ្ឌជាប់គ្នាទាំងនេះ ធ្វើពីមាសមានសរសៃឆ្មាៗស្តើងប្រវែង ៣ សង់ទីម៉ែត្រ ដែលតាមការប៉ានប្រមាណ មានអាយុកាលពី ៩០០-៧០០ ឆ្នាំមុន គ.ស។ ប៉ុន្តែលោកសាស្រ្តាចារ្យ និងមិត្តរួមការងាររបស់គាត់មិនទាន់ប្រាកដថា បំណែកដែលពួកគាត់រកឃើញនេះជាអ្វីឲ្យច្បាស់នៅឡើយទេ ។
យោងតាមគេហទំព័ររបស់សារមន្ទី លោកសាស្ត្រាចារ្យបាននិយាយថា៖ «ការពិតទៅ ខ្ញុំគិតថាអ្វីដែលពួកយើងរកឃើញនេះ ទំនងជាផ្នែកមួយនៃអាវរបស់ព្រះរាជគ្រូនៃរាជាអង្គណាមួយ ឬគ្រឿងលម្អរ ដូចជាមួកពាក់ពីលើក្បាល ឬ ប្រហែលជាគេយកទៅត្បាញចូលទៅក្នុងសំលៀកបំពាក់ជាដើម»។
បំណែកសន្លឹកមាសវ័ណ្ឌគ្នានេះនឹងបន្តដាក់តាំងបង្ហាញនៅសារមន្ទីរក្រុង Skaelskor សប្តាហ៍ក្រោយ។
បំណែកសន្លឹកមាសវ័ណ្ឌគ្នានេះត្រូវបានជីករកឃើញនៅតំបន់ Boeslunde ដែលជាកន្លែងកំណាយវត្ថុបុរាណធ្វើពីមាសនៃ យុគសម័យសំរិទ្ធ ។ ខណៈពែងមាសជាច្រើន និងចិញ្ចៀនអាពាហ៍ពិពាហ៍ត្រូវបានរកឃើញនៅទីនោះកាលពី ២០០ ឆ្នាំមុន។
សំណល់នៃប្រអប់រោមសត្វត្រូវបានរកឃើញនៅក្បែរកន្លែងជីកយកបំណែកសន្លឹកមាសវ័ណ្ឌគ្នានោះដែរ ត្រូវបានគេឲ្យដឹងថា ជាទីតាំងគោរពបូជាព្រះអាទិត្យរបស់បុព្វបុរស ដាណឺម៉ាក។ នេះបើយោងតាមលោកស្រីបុរាណវិទូ Kirsten Christiansen មកពីសារមន្ទី West Zealand Museum ។
លោកស្រីបាននិងកំពុងតែធ្វើការជីកនៅក្នុងតំបន់នេះបន្ថែមទៀត ក្នុងករណីសង្ស័យថា អាចមានវត្ថុបុរាណជាទ្រព្យសម្បត្ដិច្រើនជាងនេះទៀតនៅខាងក្រោមដីនាតំបន់កំណាយវត្ថុបុរាណនេះ៕ BBC/AD/khmerpost
