ដោយ៖ វីអូឌី | ថ្ងៃសុក្រ ទី12 មិថុនា 2015, 09:58 AM
សិស្សសាលានៅប្រទេសកូរ៉េខាងត្បូង ពាក់ម៉ាស់ដើម្បីបង្ការការឆ្លងជំងឺផ្លូវដង្ហើម (រូបថត៖ www.indianexpress.com)
យោងតាមមជ្ឈមណ្ឌលគ្រប់គ្រង និងទប់ស្កាត់ជំងឺ របស់សហរដ្ឋអាមេរិក ជំងឺផ្លូវដង្ហើមមជ្ឈឹមបូព៌ា MERS គឺជាជំងឺផ្លូវដង្ហើមបង្កឡើងដោយវីរុសឈ្មោះកូរ៉ូណាវីរុសថ្មី (MERS-CoV) ។ ជំងឺ MERS ធ្វើឲ្យប៉ះពាល់ដល់ប្រព័ន្ធដង្ហើម (សួត និងបំពង់ខ្យល់) ។ អ្នកជំងឺ MERS ភាគច្រើនមានជំងឺផ្លូវដង្ហើមស្រួច ដែលមានរោគសញ្ញាដូចជាគ្រុនក្ដៅ ក្អក និងពិបាកដកដង្ហើម ។ អ្នកជំងឺ៣ទៅ៤នាក់ក្នុងចំណោម១០នាក់ដែលត្រូវគេរាយការណ៍ថាមានជំងឺ MERS បានស្លាប់ ។
ដំបូងឡើយ មន្ត្រីសុខាភិបាលបានរាយការណ៍ជំងឺនេះនៅក្នុងប្រទេសអារ៉ាប៊ីសាអូឌីត ក្នុងខែកញ្ញា ឆ្នាំ២០១២ ។ ក្រោយមក តាមការស្រាវជ្រាវ មន្ត្រីសុខាភិបាលបានកំណត់មុខសញ្ញាថា ករណីដំបូងនៃជំងឺ MERS ដែលគេបានដឹងគឺបានកើតឡើងនៅក្នុងប្រទេសហ្ស៊កដានី (Jordan) ក្នុងខែមេសា ឆ្នាំ២០១២ ។ រហូតមកដល់បច្ចុប្បន្ន ករណីភាគច្រើននៃជំងឺនេះត្រូវបានរាយការណ៍មកពីបណ្ដាប្រទេសនៅមជ្ឈឹមបូព៌ា ។
ថ្មីៗនេះ ជំងឺនេះបានផ្ទុះឡើងនៅក្នុងប្រទេសកូរ៉េខាងត្បូង ដោយមានមនុស្សយ៉ាងតិច១២៥នាក់ត្រូវរកឃើញថាបានឆ្លងជំងឺនេះ និងបានសម្លាប់មនុស្សយ៉ាងតិច១០នាក់ ។
ដោយសារជំងឺ MERS នេះជាជំងឺថ្មី នៅមានការយល់ដឹងពីជំងឺនេះតិចតួច ហើយគេមិនទាន់ដឹងពិតប្រាកដពីរបៀបឆ្លងនៃវីរុសដែលបង្ករោគនេះនៅឡើយទេ និងគ្មានវ៉ាក់សាំង ឬការព្យាបាលជាក់លាក់សម្រាប់ជំងឺនេះទេ ។ យ៉ាងណាក៏ដោយ មជ្ឈមណ្ឌលគ្រប់គ្រង និងទប់ស្កាត់ជំងឺ របស់សហរដ្ឋអាមេរិក ឲ្យដឹងថា ជំងឺនេះអាចឆ្លងទៅមនុស្សរាល់គ្នា ។ អ្នកជំងឺ MERS មានចាប់ពីអាយុក្រោម១ឆ្នាំដល់៩៩ឆ្នាំ ។
ក្រសួងសុខាភិបាលកម្ពុជា និងអង្គការសុខភាពពិភពលោកបានណែនាំពីវិធានការមួយចំនួន ដើម្បីកាត់បន្ថយការប្រឈមមុខនៃការឆ្លងដូចជា ជៀសវាងប៉ះពាល់ជិតស្និទ្ធជាមួយអ្នកមានជំងឺផ្លូវដង្ហើមស្រួច លាងដៃជាមួយសាប៊ូនិងទឹកឲ្យបានញឹកញាប់ ជៀសវាងអាហារដែលមានសាច់សត្វ ឬទឹកដោះគោដែលចម្អិនមិនឆ្អិនល្អ និងជៀសវាងប៉ះពាល់ជិតស្និទ្ធជាមួយកសិដ្ឋានឬសត្វរស់ ឬលាងដៃឲ្យបានទៀងទាត់មុនពេលនិងបន្ទាប់ពីការប៉ះសត្វ ៕
