លោកអ៊ុំ សំអាន តំណាងរាស្ត្រមណ្ឌលខេត្តសៀមរាប មកពីគណបក្សសង្គ្រោះជាតិ ដែលសកម្មក្នុងរឿងព្រំដែនកម្ពុជា និងវៀតណាម បានលើកឡើងក្នុងបណ្ដាញសង្គមហ្វេសប៊ុក របស់លោកថា រដ្ឋា ភិបាលប្រើផែនទីបោន ខ្នាត 1/100.000 ចំនួន២៦ផ្ទាំង ដើម្បីផ្ទៀងផ្ទាត់ជាមួយផែនទីបោនខ្នាត 1/100.000 របស់រដ្ឋាភិបាលបារាំង និងផែនទី UTM ខ្នាត 1/100.000 របស់អង្គការសហប្រជាជាតិ ប៉ុន្តែពេលបោះបង្គោលព្រំដែន រដ្ឋាភិបាលបែជាប្រើផែនទី UTM ខ្នាត 1/50.000 ចំនួន៤០ផ្ទាំង (ចែងក្នុងទំព័រទី១២នៃ សន្ធិសញ្ញាឆ្នាំ ១៩៨៥ និងប្រការ៣ចំណុច២នៃសន្ធិសញ្ញាបំពេញបន្ថែមឆ្នាំ២០០៥)ទៅវិញ ។
នៅក្នុងនោះផងដែរលោកបញ្ជាក់ថា ការបោះបង្គោលរវាងកម្ពុជា ជាមួយប្រទេសវៀតណាម បានប្រើផែនទី UTM ខ្នាត 1/50.000 ចំនួន២៦ផ្ទាំង ដែលចម្លងពីផែនទីបោនខ្នាត 1/100.000 ចំនួន២៦ផ្ទាំងផងដែរ នៅក្នុង"ប្រការ៣ចំណុច១នៃសន្ធិសញ្ញាបំពេញបន្ថែមឆ្នាំ២០០៥" (ចម្លងនិងបោះពុម្ភនៅប្រទេសវៀតណាម) ឯផែនទីបោនខ្នាត 1/100.000 គ្រាន់តែប្រើអមប៉ុណ្ណោះ។ ដោយផែនទីបោនប្រើមុំ ឯផែនទី UTM ប្រើម៉ែត្រ ដូច្នេះមានតែផែនទី UTMទេ ដែលស៊ីគ្នាជាមួយ GPS និងបច្ចេកវិទ្យាទំនើប ចំណែកផែនទីបោនមិនស៊ីគ្នាជាមួយ GPS និងបច្ចេកវិទ្យាទំនើបនោះទេ។
ហេតុនេះហើយបានជារដ្ឋាភិបាលប្រើផែនទី UTM ខ្នាត 1/50.000 ដើម្បីបោះបង្គោលព្រំដែន ប៉ុន្តែផែនទី UTM ខ្នាត 1/50.000 នេះផ្ទុយមាត្រា២នៃរដ្ឋធម្មនុញ្ញកម្ពុជា ដែលតម្រូវឲ្យប្រើផែនទីខ្នាត 1/100.00 0។ មូលហេតុនេះហើយដែលលោក ហ៊ុន សែន និងលោកបណ្ឌិត សុខ ទូច ចង់ឲ្យធ្វើវិសោធនកម្មមាត្រា២ នៃរដ្ឋធម្មនុញ្ញដើម្បីតម្រូវអ្វីដែលរដ្ឋាភិបាល ប្រើផែនទីផ្ទុយពីរដ្ឋធម្មនុញ្ញកន្លងមក។
លោកអ៊ុំ សំអាន បានបន្ថែមថា ការប្រើផែនទី UTM ខ្នាត 1/50.000 ធ្វើឲ្យចំណេញដល់វៀតណាម ទើបវៀតណាមជ្រើសរើសយកផែនទីនេះសម្រាប់ធ្វើការបោះបង្គោលព្រំដែន។ ការបំឡែង (Convert) ពីផែនទីបោនខ្នាត 1/100.000 ទៅផែនទី UTM ខ្នាត 1/100.000 ដើម្បីឲ្យស៊ីគ្នាជាមួយ GPS និងបច្ចេកវិទ្យាទំនើប។ ផែនទីបោនខ្នាត 1/100.000 ជាផែនទីក្រុមភូមិសាស្ត្រឥណ្ឌូចិន (ផែនទីបារាំង) ស្របតាមមាត្រា២នៃរដ្ឋធម្មនុញ្ញ ឯផែនទី UTM ខ្នាត 1/50.000 ជាផែនទីយោធាអាមេរិកាំងតែប៉ុនោះ។
បើតាមមាត្រា២នៃរដ្ឋធម្មនុញ្ញកម្ពុជា និងច្បាប់អន្តរជាតិស្តីពីម្ចាស់កម្មសិទ្ធិកាន់កាប់ទឹកដីក្រោយសង្គ្រាម លោកអ៊ុំ សំអាន បានសង្គត់ធ្ងន់ថា ត្រូវយកផែនទីបោនខ្នាត 1/100.000 ដែលបារាំងបានបន្ស ល់ទុកឲ្យ ដើម្បីបោះបង្គោលព្រំដែន ប៉ុន្តែរដ្ឋាភិបាលប្រើផែនទីអមសន្ធិសញ្ញាឆ្នាំ១៩៨៥សម័យយួនត្រួតត្រាខ្មែរ សម្រាប់បោះបង្គោលព្រំដែន ហើយមិនបានប្រើផែនទីបោនខ្នាត 1/100.000 ដែលតម្កល់នៅអង្គការសហប្រជាជាតិនោះទេ។ យ៉ាងណាក៏ដោយ វិទ្យុវាយោបានព្យាយាមទាក់ទងទៅកាន់មន្ត្រីជំនាញព្រំដែន ដើម្បីឆ្លើយតបនឹងបញ្ហានេះ តែមិនអាចទាក់ទងបាន៕(ដោយ៖សេង បារាំង)
