ទិដ្ឋភាពប្រជាពលរដ្ឋចូលផ្សារទំនើប អីុអន ពេលបើកដំណើរការដំបូងកាលពីឆ្នាំទៅ។ មកទល់ពេលនេះការបើកដំណើរការមានរយៈពេលមួយឆ្នាំហើយ។ Scott Howes
ភ្នំពេញៈ ក្នុងរយៈពេលមួយឆ្នាំនៃការដំណើរការផ្សារទំនើបអីុអនបានបង្ហាញពីភាពពេញនិយមយ៉ាងខ្លាំង ប៉ុន្តែមានក្រុមហ៊ុនជាច្រើននៅតែបានចាកចេញ។
ផ្សារទំនើបអីុអនដែលជាការវិនិយោគទឹកប្រាក់ ២០៥លានដុល្លារអាមេរិកបានបើកដំណើរការកាលពីថ្ងៃទី៣០ ខែមិថុនា ឆ្នាំមុនដែលស្វាគមន៍ដល់អតិថិជនយ៉ាងច្រើនកុះករ។
បន្ទាប់ពីពិធីបើកដំណើរការជាផ្លូវការដោយលោកនាយករដ្ឋមន្ដ្រី ហ៊ុន សែន និងលោក Fumio Kishida រដ្ឋមន្ដ្រីក្រសួងការបរទេសជប៉ុន អ្នកដើរទិញអីវ៉ាន់រាប់ពាន់នាក់បានប្រជ្រៀតគ្នាចូលទៅក្នុងហាងមានម៉ាស៊ីនត្រជាក់ខណៈដែលរ៉ឺម៉កម៉ូតូ និងម៉ូតូឌុបបានរង់ចាំនៅជិតៗនោះ។
រយៈពេលមួយឆ្នាំក្រោយមក ផ្សារទំនើបមានមូលដ្ឋាននៅប្រទេសជប៉ុនសាខានៅទីក្រុងភ្នំពេញមួយនេះបានរាយការណ៍ថា ទទួលបានអតិថិជន ១៥លាននាក់ ខណៈក្រុមហ៊ុននៅពេលនេះកំពុងពិចារណាអំពីផ្សារទំនើបទីពីរនៅទីក្រុងភ្នំពេញ ដោយសារតែអ្នកមានថ្នាក់កណ្ដាលដែលកំពុងកើនឡើងនៅក្នុងតំបន់អាស៊ីអាគ្នេយ៍។
ប៉ុន្តែខណៈការធ្វើចរាចរណ៍ដោយថ្មើរជើងយ៉ាងច្រើនជាផ្នែកមួយនៃផ្សារទំនើបអីុអនដំបូងនៅក្នុងប្រទេសកម្ពុជាមិនអាចប្រកែកបាន ហាងលក់ និងភោជនីយដ្ឋានមួយចំនួនបានជម្នះក្នុងការប្រកួតប្រជែងគ្នាដោយសារតែការជួលទីតាំងមានតម្លៃខ្ពស់ ផលិតផលមានតម្លៃថ្លៃ និងកង្វះចំណេះដឹងអំពីអ្វីដែលអតិថិជនថ្នាក់កណ្ដាលពិតជាត្រូវការក្នុងរយៈពេលវែងរបស់ប្រទេសកម្ពុជា។
លោក Phillip Scott អ្នកអង្កេតនៅក្រុមហ៊ុនអចលនទ្រព្យ CBRE Cambodia បានថ្លែងថា ខណៈដែលផ្សារទំនើបអីុអននៅតែផ្តោតលើប្រជាជនថ្នាក់កណ្ដាលនៅទីក្រុង គឺវានៅតែ «កំពុងបង្កើតដោយខ្លួនឯង» នៅក្នុងប្រទេសកម្ពុជា។ លោកលើកឡើងថា៖ «ការពិបាកគឺការទទួលបានផលិតផលត្រឹមត្រូវមួយ»។
ចាប់តាំងពីការបើកដំណើរការរបស់ខ្លួនមក មានហាងលក់ចំនួន១២លែងមានក្នុងបញ្ជីជាហាងប្រតិបត្តិការដោយអីុអនទៀតហើយ។ ហាងដែលចាកចេញភាគច្រើនទាំងនោះគឺជាភោជនីយដ្ឋានសម្រាប់មនុស្សថ្នាក់ខ្ពស់ និងហាងលក់សម្លៀកបំពាក់ ដូចជាហាងលក់សម្លៀកបំពាក់កូនក្មេង Tiny Toes និងហាងកាហ្វេ Miam Miam របស់ប្រទេសសិង្ហបុរី។
លោក Makoto Yajima នាយកផ្សារទំនើបអីុអនបានថ្លែងថា មូលហេតុរបស់ពួកគេសម្រាប់ការចាកចេញគឺ «ផ្សេងៗគ្នា» ដែលជាធម្មតាមិនមែនជាការចំណាយតម្លៃខ្ពស់សម្រាប់កម្ពុជានោះទេ។ លោកបានបន្តថា៖ «បច្ចុប្បន្ន យើងកំពុងផ្ដោតលើការកើនឡើងទីផ្សារនៅទីក្រុងភ្នំពេញ»។
ចំណុចដ៏រឹងមាំមួយរបស់អីុអនគឺកន្លែងញ៉ាំអាហារ ដែលមានហ្វូងមនុស្សទិញអាហាររហូតដល់ម៉ោង៩:៣០ យប់ ដែលមើលទៅដូចជាការញ៉ាំអាហារនៅតាមដងផ្លូវដែលជាធម្មតាកើតមាននៅកម្ពុជា។
ប៉ុន្តែមានអាហារភាគច្រើនមានតម្លៃមិនដល់៤ដុល្លារអាមេរិកនោះទេ ភាពជោគជ័យរបស់ទីតាំងលក់អាហារបានបង្កឲ្យមានការបារម្ភក្នុងចំណោមភោជនីយដ្ឋានដែលដំណើរការដោយខ្លួនឯងនៅក្នុងផ្សារទំនើបអីុអន។
លោក ទេព វីរៈ អ្នកគ្រប់គ្រងទូទៅនៅក្រុមហ៊ុន Express Food Group ដែលដំណើរការពាណិជ្ជសញ្ញាចំនួន៤នៅក្នុងផ្សារទំនើបអីុអនគឺ ហាង The Pizza Company ហាង Swensen ហាង Costa Coffee និងហាង Dairy Queen បានថ្លែងថា៖ «ចាប់តាំងពីទីតាំងលក់អាហាររបស់ផ្សារអីុអនកំពុងលក់នៅក្នុងតម្លៃទាប វាកំពុងធ្វើឲ្យស្លាប់ដល់ភោជនីយដ្ឋានផ្សេងទៀតនៅក្នុងផ្សារទំនើបនេះ»។
លោក វីរៈ បន្ថែមថា ផ្សារទំនើបអីុអនចាំបាច់ត្រូវគ្រប់គ្រងនៅក្នុងការគិតតម្លៃសេវាខ្ពស់របស់ខ្លួន និងតម្លៃជួល និងការទាក់ទាញយីហោធំៗកាន់តែច្រើនដើម្បីទាក់ទាញអតិថិជន។
តម្លៃជួលខ្ពស់ និងកង្វះអតិថិជនបានបណ្ដាលមានកន្លែងញ៉ាំអាហារសម្រាប់មនុស្សថ្នាក់ខ្ពស់ ដែលជាភោជនីយដ្ឋានរបស់ប្រទេសជប៉ុន-បារាំង FINCH បានចាកចេញរយៈពេលពីរខែកន្លងមកហើយ។
លោក ថាន់ សារិទ្ធ នាយករបស់ភោជនីយដ្ឋាន FINCH បានថ្លែងថា ភោជនីយដ្ឋាននេះបានខាតបង់អស់ ៣០ ០០០ដុល្លារអាមេរិកក្នុងមួយខែ ដោយសារតែ តម្លៃជួល១០ ០០០ដុល្លារអាមេរិកក្នុងមួយខែ។
លោកបន្តថា៖ «វាគឺជាតម្លៃដ៏ខ្ពស់សម្រាប់ការជួល ហើយយើងបានចំណាយប្រាក់ច្រើនណាស់»។
ភោជនីយដ្ឋានដែលមានតម្លៃខ្ពស់ផ្សេងទៀតបានចាកចេញពីផ្សារទំនើបអីុអននៅពេលថ្មីៗដូចជា ភោជនីយដ្ឋាន Fox Wine Bistro ខណៈដែលភោជនីយដ្ឋានរបស់បារាំង Maison Kayser កំពុងត្រូវបានដាក់ជំនួសដោយហាង Domino Pizza ។
ប៉ុន្តែបញ្ហាប្រឈមមិនត្រូវបានកម្រិតតែចំពោះភោជនីយដ្ឋាននោះទេ។ ហាងលក់សម្លៀកបំពាក់ទាន់សម័យសម្រាប់មនុស្សថ្នាក់ខ្ពស់ផ្សេងទៀតមួយចំនួនក៏បានចាកចេញផងដែរ ដូចជាហាង Thai retailer Espada។
លោក ស៊ីម ចំពិសី ប្រធានគ្រប់គ្រងទូទៅហាងលក់សម្លៀកបំពាក់ Le Marais បានថ្លែងថា៖ «យើងនៅតែត្រូវការអតិថិជនកាន់តែច្រើន» ដើម្បីការពារលើការចំណាយ ដូចជា ការចំណាយលើតម្លៃជួល៣២០០ដុល្លារអាមេរិកជារៀងរាល់ខែ។ លោកបានបញ្ជាក់៖ «ជនបរទេសមួយចំនួនបានចូលមក ប៉ុន្តែប្រជាជនកម្ពុជានៅតែមិនស្គាល់យើងនៅឡើយ»។
យោងតាមលោក Scott នៅក្រុមហ៊ុន CBRE ប្រជាជនកម្ពុជាដែលចំណាយខ្ពស់ភាគច្រើនដែលផ្សារទំនើបអីុអនកំពុងផ្តោត មានបំណងជាស្រេចដោយជ្រើសរើសទៅបរទេសសម្រាប់ការលក់រាយ ដែលពួកគេមានជម្រើសកាន់តែច្រើនផងដែរ។ លោកលើកឡើងថា៖ «ប្រសិនបើអ្នកចង់ចំណាយប្រាក់ ៧០ដុល្លារលើអាវមួយ ជាទូទៅអ្នកនឹងទិញវានៅក្នុងទីក្រុងបាងកក ឬនៅក្នុងប្រទេសសិង្ហបុរី»។
លោកបញ្ជាក់ថា សម្រាប់ពេលនេះ ភាពជោគជ័យរបស់ផ្សារទំនើបអីុអនភាគច្រើនពឹងលើអាហារ និងភេសជ្ជៈ និងការកម្សាន្ត។
លោក ជី សិលា ដៃគូក្នុងស្រុករបស់រោងភាពយន្ត Major Cineplex មានមូលដ្នាននៅប្រទេសថៃបានឲ្យដឹងថា នៅភ្នំពេញពេលនេះរោងភាពយន្តគឺជាការយកចិត្តទុកដាក់ដ៏ធំមួយ។
ជាឧទាហរណ៍នៅពេលរោងភាពយន្ត Jurassic World បានបើកដំណើរការនៅក្នុងប្រទេសកម្ពុជាកាលពីឆ្នាំមុន ការលក់សំបុត្រចូលទស្សនាបានចំនួន ៦ ០០០ សំបុត្រក្នុងរយៈពេលតែចុងសប្ដាហ៍ប៉ុណ្ណោះ ដែលជាកម្រិតមួយខ្ពស់បំផុតរបស់ខ្លួនរហូតមកដល់ពេលនេះ។ លោកសីលាបានបន្តថា៖ «រោងភាពយន្ត Major Cineplex កំពុងដំណើរការបានយ៉ាងល្អ»។
ទោះបីជាមានបញ្ហាប្រឈមមួយចំនួនក៏ដោយ ក៏លោក Yajima នាយកផ្សារទំនើបអីុអនកម្ពុជាថ្លែងថា វាមិនទាន់ជារឿងជោគជ័យរបស់ផ្សារទំនើបនៅឡើយទេ ខណៈទីផ្សារទំនិញជប៉ុននៅកម្ពុជាត្រូវបានគេរំពឹងថានឹងកើនឡើងនៅក្នុងទំហំធំ និងខ្លាំង ដោយសារតែការវិនិយោគរួមដូចជា ផ្សារទំនើបអីុអន។ នេះបើយោងតាមលោក Masashi Kono អគ្គនាយករបស់អង្គការពាណិជ្ជកម្មក្រៅប្រទេសរបស់ប្រទេសជប៉ុន។
លោកបានបញ្ជាក់ថា៖ «នៅពេលនេះ វាមិនខ្លាំងប៉ុន្មាននោះទេ ប៉ុន្តែបន្ទាប់ពីការលេចឡើងផ្សារទំនើបធំៗមក របៀបរស់នៅរបស់ប្រជាជនអាចមានការផ្លាស់ប្តូរ»។
លោកបានបន្ថែមទៀតថា៖ «សម្រាប់ពេលអនាគត ប្រទេសមានលទ្ធភាពនិងសក្ដានុពលច្រើនបំផុត»៕PB
*****************************
Source:http://www.postkhmer.com/
*****************************
Source:http://www.postkhmer.com/
