សមាជិក WTO ឯកភាពលើការអនុគ្រោះពន្ធ ១០០០ ពាន់លានដុល្លារ លើផលិតផលបច្ចេកវិទ្យា
កាលពីថ្ងៃសុក្រម្សិលមិញ សមាជិកអង្គការពាណិជ្ជកម្មពិភពលោក (World Trade Organization – WTO) បានឯកភាពលើកិច្ចព្រមព្រៀងដែលមានគោលដៅអនុគ្រោះពន្ធលើការនាំចូល សរុបជាទឹកប្រាក់ចំនួន ១០០០ ពាន់លានដុល្លារ (Trillion) លើផលិតផលបច្ចេកវិទ្យាព័ត៌មាន IT (Information Technology)។ ធ្វើបែបនេះ ដើម្បីលើកទឹកចិត្ត និងបង្កលក្ខណៈងាយស្រួលសម្រាប់ក្រុមហ៊ុនដែលផលិតផលិតផលប្រភេទនេះ ពង្រីកសក្ដានុពលផលិត និងអភិវឌ្ឍគុណភាពផលិតផលឲ្យកាន់តែប្រសើរឡើង។ ផលិតផលទាំងនោះមានដូចជា ៖ ប្រភេទវីដេអូហ្គេម និងឧបករណ៍ប្រើប្រាស់ក្នុងវិស័យវេជ្ជសាស្ត្រ (គ្រឿងបរិក្ខាបំពាក់នៅក្នុងមន្ទីរពេទ្យ – medical equipments) ។
នេះជាកិច្ចព្រមព្រៀងដែលកើតឡើងក្រោយពីយកកិច្ចព្រមព្រៀងចាស់មកធ្វើវិសោធនកម្ម និងពិនិត្យកែសម្រួលឡើងវិញត្រង់ចំណុចខ្លះ ដើម្បីឲ្យស៊ីសង្វាក់នឹងស្ថានការណ៍វិវត្តិ។ កិច្ចព្រមព្រៀងចាស់មានអាយុកាល ១៨ ឆ្នាំហើយ ក្រោមចំណងជើងថា «កិច្ចព្រមព្រៀងបច្ចេកវិទ្យាព័ត៌មាន – ITA (Information Technology Agreement»។ ដោយឡែក កិច្ចព្រមព្រៀងថ្មីនេះបានដាក់បន្ថែមមុខទំនិញផលិតផលបច្ចេកវិទ្យាជាង ២០០ មុខបន្ថែមទៀត។ ផលិតផលទាំងនេះត្រូវបានលើកលែងពន្ធរហូតដល់ ០% ដែលមានន័យថារួចពន្ធទាំងស្រុង (Duty-free trade)។
លោក Michael Rroman ជាអ្នកតំណាងមកពីអាមេរិក ថ្លែងថាការពង្រីកកិច្ចព្រមព្រៀង ITA គឺជាព័ត៌មានដ៏ល្អមួយសម្រាប់និយោជិតគ្រប់លំដាប់ថ្នាក់នៅសហរដ្ឋអាមេរិក ក៏ដូចជារោងចក្រសហគ្រាសនានាដែលរកទទួលទានខាងផលិតផលបច្ចេកវិទ្យាគ្រឿងអេឡិចត្រូនិក។ មានក្រុមហ៊ុនបច្ចេកវិទ្យាមួយចំនួនដូចជា General Electric Co -Intel Corporation -Texas Instruments Inc -Microsoft Corp and Nintendo សុទ្ធតែជាក្រុមហ៊ុនដែលរំពឹងថានឹងទទួលបានផលប្រយោជន៍ពីកិច្ចព្រមព្រៀងនេះ។
សូមបញ្ជាក់ថាក្រៅផលិតផលដូចដែលបានជម្រាបជូនខាងលើនេះ នៅមានផលិតផលដទៃទៀតក៏ទទួលបានការអនុគ្រោះពន្ធទាំងស្រុងផងដែរ។ ផលិតផលទាំងនោះរួមមាន ៖ កម្មវិធី Software កុំព្យូទ័រ – កម្មវិធី Software របស់បណ្ដាញផ្សព្វផ្សាយ – ឧបករណ៍លេងហ្គេម – ម៉ាស៊ីនថតចម្លង និងបោះពុម្ព – ឧបករណ៍មើលផែនទីផ្លូវ GPS និងគ្រៀងបរិក្ខាដែលបំពាក់នៅក្នុងមន្ទីរពេទ្យ៕
-------------------------------
Source:thebnews
