កីឡាករអាំង សំអាត (ឆ្វេង) នឹងត្រូវជួបជាមួយនឹងគឿម សុវណ្ណឌឿត ក្នុងការប្រកួតគូឯកនៅថ្ងៃសៅរ៍នេះដើម្បីជំនួសគូខ្សែក្រវាត់ K Cement។ ស្រេង ម៉េងស្រ៊ុន
ភ្នំពេញ: ជើងខ្លាំងទម្ងន់ស្រាលពីរនាក់រួមមាន កីឡាករអាំង សំអាត មកពីក្លិបតាព្រហ្មមានជ័យ និងគឿម សុវណ្ណឌឿត មកពីក្លិបមោងឫស្សីខេត្តបាត់ដំបង នឹងត្រូវដាក់ឲ្យជួបគ្នាក្នុងការប្រកួតគូឯកប្រចាំសប្តាហ៍ជំនួសគូខ្សែក្រវាត់ K Cement ទម្ងន់ ៦០ គីឡូក្រាមនាថ្ងៃសៅរ៍ ទី ១២ ខែកក្កដា ឆ្នាំ ២០១៥ ក្រោយពីការប្រកួតគូខ្សែក្រវាត់នេះ ត្រូវផ្អាកមួយសប្តាហ៍ដើម្បីទុកពេលឲ្យកីឡាករបានហ្វឹកហាត់ ពីព្រោះនៅសល់តែមួយជុំទៀត នឹងបញ្ចប់ការប្រកួតវិលជុំហើយ។
កីឡាករប្រដាល់ទាំងពីរនាក់នេះ នឹងប្រកួតគ្នាក្នុងទម្ងន់ ៥៧ គីឡូក្រាម និងជាគូឯកដែលមានទឹកចិត្តធំ និងវាយសម្រុកមិនចេះដកថយ ប៉ុន្តែ ប្រវត្តិប្រកួតរបស់អ្នកទាំងពីរមានភាពខុសពីគ្នាឆ្ងាយណាស់ ដោយសារតែកីឡាករ អាំង សំអាត ជាកីឡាករជើងចាស់ និងធ្លាប់ឈ្នះខ្សែក្រវាត់ ព្រមទាំងធ្លាប់ឈ្នះកីឡាករបរទេសទៀតផង។
ចំណែក កីឡាករគឿម សុវណ្ណឌឿត ទើបតែចាប់ផ្តើមល្បីល្បាញជំនាន់ក្រោយ ប៉ុន្តែ មួយរយៈនេះ រូបគេទទួលបានជ័យជម្នះរហូតគួរឲ្យកត់សម្គាល់។
ចំណែក កីឡាករគឿម សុវណ្ណឌឿត ទើបតែចាប់ផ្តើមល្បីល្បាញជំនាន់ក្រោយ ប៉ុន្តែ មួយរយៈនេះ រូបគេទទួលបានជ័យជម្នះរហូតគួរឲ្យកត់សម្គាល់។
ទោះជាយ៉ាងនេះក្តី សម្រាប់ការប្រកួតមួយគូនេះ លទ្ធផលប្រកួតត្រូវបានអ្នកទស្សនាភាគច្រើនបំផុតដែលស្គាល់សមត្ថភាពក្បាច់គុនរបស់កីឡាករទាំងពីរនៅតែមានជំនឿថា អាំង សំអាត មានភាគរយឈ្នះច្រើនលើ សុវណ្ណឌឿត។
លោកញាន សុធី អ្នកគ្រប់គ្រងកម្មវិធី បានបកស្រាយថា៖ «សម្រាប់គូឯកមួយគូនេះ យើងក៏បានគិតឃើញថា អាំង សំអាត មានបទពិសោធច្រើន និងចាស់វស្សាជាងផងដែរ ប៉ុន្តែសុវណ្ណឌឿត មានប្រៀបផ្នែកកម្លាំង ដោយសារគេនៅក្មេងជាង និងមានទឹកចិត្តប្រកួតចូលវាយសម្រុកមិនដកថយ ហើយក៏មានស្នៀតទាត់ធ្ងន់ៗផងដែរ»។
លោកញាន សុធី បានអះអាងថា៖ «ការផ្គូផ្គងកីឡាករឲ្យប្រកួតគ្នា មិនអាចឲ្យបានមានសមត្ថភាពស្មើគ្នា ១០០ ភាគរយនោះទេ ហើយចំណុចពិសេសនៃក្បាច់គុនរបស់កីឡាករនីមួយៗពិតជាមានប្រៀបលើគ្នា ទៅវិញទៅមក ហើយលទ្ធផលពិតនោះទាល់តែប្រកួតចប់ទើបយើងទាយត្រូវ»។
ទាក់ទងនឹងការប្រកួតខាងមុខនេះ គឿម សុវណ្ណឌឿត បាននិយាយថា៖ «ខ្ញុំធានាប្រកួតអស់ពីសមត្ថភាព និងបានហ្វឹកហាត់ត្រៀមប្រកួតបានល្អ ហើយខ្ញុំសង្ឃឹមយកឈ្នះ ប៉ុន្តែមិនហ៊ានថា ប៉ុន្មានភាគរយនោះទេពីព្រោះគេជាជើងចាស់ និងធ្លាប់ឈ្នះបានខ្សែក្រវាត់ផងដែរ»។
ទោះបីអាំង សំអាត មានប្រៀបផ្នែកបច្ចេកទេសក៏ដោយ ប៉ុន្តែ គេមានចំណុចខ្សោយផ្នែកកម្លាំងនៅចុងទឹកដែលជាឱកាសល្អមួយដែររបស់សុវណ្ណឌឿត ដែលមានប្រៀបផ្នែកកម្លាំងថេរបាន ៥ ទឹកនោះ។
តាមប្រវត្តិប្រកួតរបស់សុវណ្ណឌឿត រូបគេប្រកួតបានជាង ៤០ ដង ខណៈដែលអាំង សំអាត ប្រកួតបានជិត ១០០ ដងឯណោះ។
ក្រៅពីគូឯកនេះ ក៏មានគូខ្លាំងៗផងដែរ ដោយ ញ៉េ សិទ្ធ មកពីក្លិបអេភូថង ត្រូវប៉ះជាមួយកីឡាករផាន់ សារ៉ែម មកពីក្លិបគជសារក្នុងទម្ងន់ ៦០ គីឡូក្រាម ខណៈដែលកីឡាករផា សុផានិល មកពីពន្លឺសាមគ្គី ត្រូវប្រកួតជាមួយកីឡាករពុទ្ធ អារុណ មកពីពុទ្ធសេរីវង្ស ក្នុងទម្ងន់ ៥៧ គីឡូក្រាម៕
*****************************
Source:http://www.postkhmer.com/
*****************************
Source:http://www.postkhmer.com/
