ក្រុងវ៉ាស៊ីងតោន: កីឡាករប្រដាល់ Floyd Mayweather កាលពីថ្ងៃចន្ទ ត្រូវបានស្ថាប័នកីឡាប្រដាល់ពិភពលោកហៅកាត់ថា WBO ដកហូតយកខ្សែក្រវាត់ពិភពលោកក្នុងទម្ងន់មធ្យម (ពី៦៤ ដល់ ៦៩ គីឡូក្រាម) ដែលរូបគេបានឈ្នះតាមរយៈការផ្តួលកីឡាករ Manny Pacquiao កាលពីរយៈពេល ២ ខែកន្លងទៅ។
Mayweather បានខកខាន់ក្នុងការឆ្លើយតបតាមកាលបរិច្ឆេទកំណត់កាលពីថ្ងៃសុក្រ សប្តាហ៍មុន សម្រាប់ការបង់ប្រាក់ចំនួន ២០ ម៉ឺនដុល្លារអាមេរិក ដែលត្រូវបានស្នើដោយ WBO ក្រោយពីរូបគេដណ្តើមបានខ្សែក្រវាត់នេះពី Pacquiao កាលពីថ្ងៃទី ២ ខែឧសភា ក្នុងទីក្រុង Las Vegas ក្នុងការប្រកួតដែលផ្តល់ប្រាក់ចំណូលដ៏ខ្ពស់បំផុតប្រមាណជា ២២០ លានដុល្លារអាមេរិក។
ច្បាប់របស់ WBO ត្រូវតម្រូវឲ្យកីឡាករប្រដាល់បង់ប្រាក់ ៣ ភាគរយនៃទឹកប្រាក់ដែលទទួលបានសរុបរបស់ពួកគេដើម្បីប្រកួតដណ្តើមខ្សែក្រវាត់ពិភពលោកមួយ ដែលមានចំនួនជាអតិបរមាចំនួន ២០ ម៉ឺនដុល្លារអាមេរិក។ ច្បាប់នេះ ក៏ហាមមិនឲ្យម្ចាស់ខ្សែក្រវាត់ WBO ណាម្នាក់ធ្វើការគ្រប់គ្រងខ្សែក្រវាត់ណាមួយក្នុងប្រភេទទម្ងន់ផ្សេងឡើយ។
បច្ចុប្បន្ន Mayweather ក៏ជាម្ចាស់ខ្សែក្រវាត់ WBC និង WBA ផងដែរក្នុងប្រភេទទម្ងន់ ៦៩ គីឡូក្រាម ក៏ដូចជាក្នុងទម្ងន់ ៦៦ គីឡូក្រាមផងដែរ។
សេចក្តីប្រកាសមួយនៅលើគេហទំព័ររបស់អង្គភាពមានមូលដ្ឋាននៅប្រទេស ព័រតូរីកូ មួយនេះ បញ្ជាក់ថា Mayweather ដែលត្រូវបានចាត់ទុកថា ជាកីឡាករប្រដាល់មិនរើសទម្ងន់ដ៏ឆ្នើមបំផុតក្នុងពិភពលោក លែងជាម្ចាស់ខ្សែក្រវាត់ WBO ទៀតហើយ។
សេចក្តីថ្លែងការណ៍នេះបានឲ្យដឹងថា៖ «លោក Mayweather, Jr បានខកខានក្នុងការបង់ប្រាក់ចំនួន ២០ ម៉ឺនដុល្លារអាមេរិកដែលត្រូវបានតម្រូវឲ្យគេបង់ក្នុងនាមជាសមាជិកនៃការប្រកួតខ្សែក្រវាត់ពិភពលោក WBO។ បើទោះបីមានការបញ្ជាក់ប្រាប់ដល់ Mayweather Jr. ឲ្យធ្វើការអះអាងពីជំហររបស់គេក្នុងការគ្រប់គ្រងខ្សែក្រវាត់ WBO ក្នុងទម្ងន់មធ្យម និងបោះបង់ខ្សែក្រវាត់ពិភពលោកចំនួន ២ ដែលរូបគេបានឈ្នះ ប៉ុន្តែ WBO មិនទទួលបានការឆ្លើយតបឡើយ»។
ក្រោយពី Mayweather (ឈ្នះ ៤៨ លើក មិនដែលចាញ់ និងផ្តួលដៃគូឲ្យសន្លប់ ២៦ លើក) បានផ្តួល Pacquiao ដោយពិន្ទុជាឯកច្ឆន្ទ ដើម្បីឈ្នះខ្សែក្រវាត់ធំៗចំនួន ៤ រូបគេបានប្រកាសថា គេនឹងបោះបង់រាល់ខ្សែក្រវាត់របស់គេក្នុងគោលបំណងផ្តល់ឲ្យកីឡាករវ័យក្មេងមានឱកាសធ្វើការដណ្តើមយក៕ AFP/IS
